قــصــة كــفــاح باسم سعيد ومحمد سعيد - نبض الجمهور الان مقالات قــصــة كــفــاح باسم سعيد ومحمد سعيد نبض الجمهور الان

أنا كنت إنسان طبيعي جدًا عنده طموح وأمل في الحياه زي أي إنسان عادي من عيلة وابن ناس محترمة بدرس ونفسي أطلع حد منتج ومسؤول في المجتمع وجت عليا فترة المراهقة ونزلت الشارع ومشيت مع أصحاب السوء وحب الفضول إني أجرب كل حاجه غلط أو خطر الناس بتعملها طبعًا النفس أمارة بالسوء بس طبعًا البيئة المحيطه كان ليها عامل كبير وبدأت رجلي تيجي في السجاير وحده وحده بدأ الليڤل يعلى ودخلت في سكة المخدرات ومن هنا بدأت رحلة المعاناه والألم والفشل من حد ليه طموح وأمل في الحياه لإنسان مسلوب الإرادة ملفوف طوق حولين رقبته يعاني ليل ونهار فاشل في دراسة في شغل حتى في علاقتي مع أهلي لحد ما وصلت لرفض من المجتمع بالكامل بقا كل أملي في الحياة إني أموت من كتر كسرة النفس والذل والإهانة والفشل ورفض المجتمع ليا ومن هنا بدأت أقول لنفسي وبعدين لازم أفوق واقف على رجلي من تاني استعنت بالله وبدأت أحارب في نفسي وأفشل أكتر من مره وكل مره كنت بيأس أكتر من المره اللي قبلها لحد ما جت في مره معايا وربنا قدرني على نفسي ووفقني ووقفت على رجلي من تاني وبدأت أحقق أهدافي من واحد كل أمله في الحياه الموت لواحد مسؤول ومنتج في المجتمع بفضل ربنا عليا النهاردة بقيت صاحب بيت وعيال مسؤولين مني تعبت وشقيت ووحده وحده بدأت أدرس واتعلم وعملت دبلومة في تأهيل السلوك وعلاج الإدمان ودبلومة معتمدة من مركز القاهرة لتنمية الموارد البشرية مهارات التعامل مع السلوكيات الإدمانية وأشتغل في المجال اللي بحبه وشاطر وناجح في مجالي ومميز وإني أساعد غيري أو أكون سبب في إنقاذه من الفشل أو السجون أو الموت ودا كله بفضل ربنا عليا النهاردة من إنسان فاشل لأخصائي للتأهيل النفسي وعلاج الإدمان بوزيشن مدير علاجي في طريق الحياه لمستقبل أفضل للتأهيل النفسي وتعديل السلوك وعلاج الإدمان والله ما جت معايا بالساهل بجد بحمد ربنا على اللي أنا فيه النهاردة من ستر وصحة واحترام الذات وكرم ربنا عليا
الحـمدلله حمـدًا كثـيرًا مـباركـًا فـيه
انت تقدر انت أقوى من المخدرات