طباع الشخصية النرجسية - نبض الجمهور الان مقالات طباع الشخصية النرجسية نبض الجمهور الان

السلام عليكم ورحمة الله وبركاته
حياك الله عزيزي قاريء جريدتنا الموقر جريدة الجمهور الآن

مقالي اليوم أتحدث فيه معكم عن الشخصيه النرجسية !!
أكيد كتير مننا ميعرفش يعني إيه (الشخصية النرجسية)
واللي أنا متأكدة منه أنها شخصية متواجدة بيننا جميعًا ونتعايش معها..

تعالوا نعرف يعني إيه شخصية نرجسية !!؟
وإزاي تعرف الشخص ده؟

النرجسية: هي إضطراب نفسي وخلل في الشخصية يجعل الشخص أناني، مغرور ، متكبر، مُحب لنفسة، لا يستمع للرأي الآخر، عندة غيرة مفرطة، ويكرة الآخرين إذا كانوا أفضل منة ..

الشخص النرجسي : بيشوف كل المُحِطين به أقل منه، وبيشوف نفسة أفضل من الجميع وأنه مُميز في كل شيء.. سواء في المُستوى المادي أو العلمي أو الديني أو المكانة الإجتماعية بمعني أصح مغرور جدًا ومتكبر..

الشخص النرجسي: بيسمح لنفسة إنه يقلل من أي شخص وينتقده بدون أدنى مُبالاه منة لشعور الشخص اللي أمامة.
عندة غيرة قاتلة، ميحبش يشوف شخص ناجح، ولو شاف شخص ناحج يغير منة وينتقدة ويحاول يكره كل اللي يعرفة فية ويكره الناس اللي بتحب الشخصية الناجحة دي..

إستغلالي جدًا ويعرف يستغلك صح ولو حصل وساعد حد وحصل معاه خلاف بسيط جدًا وتافه يزله ويكسره طول عمرة بالمساعدة اللي عملها له ويعايرة بيها دايمًا..

الشخص النرجسي: شخصية متسلطه جدًا من الدرجة الأولى، طالما بتتعامل مع الشخصية دي يبقي لازم تُطيع الأوامر وتسمع الكلام بدون نقاش..
ولو اعترضت أو حاولت تفهمة سبب اعتراضك مش هيعطيك فرصة للنقاش، واعرف وقتها إنك بقيت عدوة لأنك لازم تمشي على هواه ومزاجه ورغباته..

رأية من وجهة نظرة دائمًا صواب لا يحتمل أي خطأ ورأي غيرة خطأ دائمًا لا يحتمل الصواب..
لو حاولت تعارضه أو تناقشه في أي موضوع يطلعك غلطان ومش فاهم ولا تُدرك أي شيء ويقلب عليك الترابيزة لايمكن يسيبك تعارضة أو تطلعة غلطان..

الشخص النرجسي :مُتقلب المزاج يعني يبقي مزاجة كويس وبيضحك ويهزر وفي خلال ثانية إلا ربع يقلب وجهة ويتعكر مزاجة ولو سألته إيه اللي حصل مش هيرد عليك وتكفي نظراته لك اللي هتخليك تبقي عاوز تنتحر بعدها ولا تشوف النظرات دي لدرجة إنك مش هتبقى عارف إيه الذنب الكبير اللي انت عملته عشان يتصرف معاك كده، وهيخليك تشُك في نفسك إنك ممكن تكون عملت حاجة فعلًا زعلته وانت مش واخد بالك !!

الشخص النرجسي : بيحب المدح والإهتمام جدًا جدًا بشكل مُبالغ فيه بمعنى أصح لازم تعظم وتفخم فيه…

وإذا تجاهلته انت كده خسرته لأن التجاهُل بالنسبة له كأنك قتلته..
لازم يكون له مُعاملة خاصة وتقدير واهتمام أكثر من الآخرين.. يعني لو موجود مع أصحابة أو مع مجموعة أو في الأسرة لازم يكون مُميز بينهم ومُحاط بالإهتمام والتقدير أكثر من الباقيين..
لو عملت حاجة زعلته ولو بسيطة أوي يكبرها جدًا وتبقى مشكلة كبيرة..

ولو هو عمل لك مساعدة يحسسك إنه عملك إنجاز ويفخم أوي في نفسة وفي اللي عمله لك وإن من غيره العمل ده كان لايمكن إنجازة ، مع إنك شايف إن اللي عملة بسيط جدًا بس هو ده طبعة ودي شخصيتة بيعمل من الحبة قُبة كما بالمثل ..

الشخص النرجسي: أكثر كلامة عن المادة والفلوس ديمًا يحسسك إنه بيعمل كل شيء وبيتعب جدًا عشان انت تعيش سعيد ودايمًا يعايرك باللي بيعمله لك وقد إيه هو بيتعب في الفلوس اللي بيعطيها لك عشان تعيش مش ناقصك حاجه بمعنى أصح بيزلك إنه بيصرف عليك !! سواء بقى هو زوج أو أب أو أخ.. واديمًا بيربط الفلوس بالمصالح يعني لو عرف إن شخص عنده فلوس كتير يقولك أكيد دي فلوس ورثها من أبوه متعبش فيها..أو أكيد مراتة بتشتغل وتساعدة..أو لازم إبنه يكون بيشتغل معاه وبيساعده..الخ
شخص مبيعرفش يفرح ولا يحب يشوف فرحة اللي حواليه..

الشخص النرجسي :كذاب جدًا وعشان يطلع نفسه مش غلطان بيكذب ويطلعك أنت اللي بتكذب !!
عنده يكذب ولايطلع غلطان ابدًا لا يعترف بخطأه شايف نفسه ملاك والناس بقت وحشة جدًا وأنة مش عارف يتعايش مع الناس لأنهم بقوا وحشين!!

دايمًا بيخلف وعوده ويطلع مبررات عشان ميطلعش إنه أخلف وعده معاك لو تشوفه وهو بيوعدك ويمنيك تفتكر إنه فعلًا هيوفي بما وعدة معاك..لكنة يتكلم فقط دون فعل..

الشخص النرجسي: دايمًا مُنتقد يعني مثلًا لو هو زوج وقاعد مع زوجته وقت العصاري، ووجدها قاعدة ماسكة المُوبيل، أو بتتفرج على التليفزيون أو حتى ماسكة المُصحف بتقرأ فيه طبعًا يقوم ضارب البوز التمام اللي يكرهها في عيشتها !! عشان يحسسها إنه زعلان ويقول لها أنت طول النهار بتعملي إيه.. ويعد لها اللي بتعمله ويقلل من عملها !!
ويقول لها إيه يعني اللُقمة اللي بتعمليها !! وايه يعني الغسيل اللي بتغسليه وتنشريه !! ده حتى غسيلك مش بيطلع نضيف!! والأكل مش له نفس !!! والشقة مش بتنضفيها كويس !!!
ده غير بقي انتِ مش مهتمه بيه كما تفعل باقي النساء مع أزواجها !! وينزل على زوجته المسكينة بكميه انتقادات لازعة وطبعًا بقي يفخم في نفسة وسط الانتقادات الحاده دي ويقول أنا اللي بتعب وبشقى علشانكم عشان أخليكم عايشين في أحسن عيشة ومتمدوش ايديكم لحد ومعيشكُم عيشة الكل يتمناها.. بمعنى أصح بيذل كل اللي عايشين معاة إنه بيصرف عليهم !!! يعني لو عنده زوجة ربة منزل لا تعمل وبنات بيذل فيهم بلُقمتهم مبيعرفش يقول كلمه حلوة نادرًا لما يقول لازم هو اللي يسمع الكلام الحلو والتقدير والتفخيم في شخصيتة لازم يُسقط الجميع حوله .

الشخص النرجسي : بيحب يظهر أمام الناس إنه شخص مثالي ويجمل في نفسه حتى يُوقع الشخص الآخر في حُبه إذا كان يطلب الزوج..ممثل بارع جدًا حتي يُوقع ضحيتة في شباكة.

الشخص النرجسي: لو حد انتدبه عشان يُصلح بين شخصين متخاصمين أو بينهم خلاف ينتقد الشخص اللي بيفعل نفس أفعاله يعني العيوب اللي عند الناس بيشوفها وبيركز فيها وينتقدها، إنما هو لما بيعمل الأفعال دي بيشوفها ميزة عنده ..

بيخزن لك أي أساء أو لفظ قولته له وزعله منك ولا يُمكن ينساه أبدًا مهما اعتذرت له وعرفته إنه طلع بدون قصد ويعايرك بية وقت أي زعل يحصل بينكم..

لو أنت إنسان محبوب وشخصية فرفوشة وحبوبة والناس بتمدح فيك وفي جدعنتك وشهامتك يغير منك ويكرة مدح الناس فيك ويحاول يشوف لك أي عيوب عشان يظهرها للناس ويكرهم فيك..

بالمختصر المفيد الشخصية النرجسية ملهاش عزيز
يعني لوحب ودة مُستحيل لأنة شخصية مش بتحب غير ذاتها مع أول غلطة للحبيب يمحية من حياتة ولا يلتمس له اي أعذار زي ما بقول( مالوش عزيز )
يرتدي قناع الشهامة أمام الناس وهو شخص غير مسئول تمامًا
يرتدي قناع الهادئ الواثق من نفسة والقوي وهو مهزوز وضعیف داخليًا وحقود ..
يرتدي قناع الوفي والمكتفي ذاتيًا وهو خائن وکاذب وغدار
وكل من تعامل مع هذه الشخصية يكتشف مع الوقت حقيقتة ومهما حاولت إصلاحه وتغييرُة تفشل ولو وجد أن العلاقة التي بينه وبين من يحبهم سوف تنتهي يوعدهم إنه هيبقى كويس ومش هيعمل أي شيء يزعلهم تاني ولكن على
أبدًا، ابتعد فورا إذا قدرت على ذلك لأنه لا يتغير أبدًا فهو يتلاعب بك، اللي عندة الشخصية دي لازم يهرب منها بسرعة لأنها حرفيا هتدمرك نفسيًا وهتُحبط من معنوياتك …

أما لو هو زوج ، أو أب ، أو أخ ، إذن لازم تعرف شخصيتة صح عشان تعرف تتعامل معاه كما هو يُريد ويُحب حتى لا تقع في صدام معه..

فاللهم أصلح حال الجميع وسخر لنا الطيبين من عبادك.