محمود جمال مواليد “2001” لاعب كرة قدم كان يلعب في نادي وادي دجلة قبل انتقاله إلى بيراميدز يلعب في مركز الظهير كما أنه يلعب مع ناشئين الفريق وكان قد صعد للعب مع الفريق الأول عدة مرات.
*ماهي الواجهة القادمة لمحمود جمال؟
أنا لسه على ذمة نادي مينفعش أذكر أسماء بس هدرس العروض واكيد هختار المكان المناسب لي وفرصتي للعب أكبر.
*ماهو هدفك الفترة القادمة؟
هدفي الفترة القادمة المشاركة باستمرار هدفي الانضمام للمنتخب وعاوز احترف مش حابب أقعد في الدوري المصري.
*ماهو النادي الذي يتمنى محمود جمال اللعب فيه؟
داخل مصر لا وغير كده حاليًا أنا بلعب في نادي كبير وبينافس على جميع البطولات وعقدي لسه مستمر بس في ف مصر أنديه كبيرة الأهلي الزمالك الإسماعيلي وغيرهم.
*هل يفضل محمود جمال الاحتراف خارج مصر أما اللعب بالأندية المصرية؟
أكيد الاحتراف للخارج ده حلمي من الطفولة
*من هو مثلك الأعلى باللعبة؟
أجويرو
*هل تشجع نادي معين داخل أوروبا؟
برشلونه وليفربول بعد انضمام كابتن محمد صلاح
*هل تشجع نادي معين داخل مصر ورأيك بأداء الفرق المصرية؟
أنا مش مشجع أنا انتمائي لفريقي اللي بلعب فيه، الكورة المصرية في طريقها للتطوير ولكن معدل الأعمار كبير وعدم مشاركة لعيبة الصغار والشباب مأثر بالسلب على الكورة المصرية.
*هل ينتظر بيراميدز مواجهة صعبة أمام الأهلي بنهائي كأس مصر؟
أكيد المباره هتكون صعبة الأهلي فريق كبير من أكبر الفرق ف إفريقيا بس المبارة هتكون صعبة على الفرقتين اللي هيكون أكثر هدوء هيحقق الكأس.
*وهل يوجد لديك فرصة مشاركة قريبة مع الفريق الأول؟
هذا رأي مدرب أنا بشتغل وإن شاء الله فرصتي هتيجي أنا متأكد من ده
*مثلك الأعلى داخل مصر؟
محمد زيدان
*ايه هي العروض اللي متقدمة ليك حاليًا؟
كان في أكتر من فريق بس النادي متمسك بيه ورافض حاليًا بس فيه عرض من البنك الأهلي.
*لو جالك الفرصة تحترف بره تفضل أنهي دوري وأنهي نادي؟
دوري إنجليزي طبعًا لأنه الأقوى حاليًا مع إني بحب برشلونه جدًا وأفضل ليفربول أول السيتي.
*بعد أزمة الإسماعيلي الأخيرة لو جالك عرض من نادي هل هتوافق؟
طبعًا الإسماعيلي فريق كبير، والأزمة دي مش هتطول.
*هل الأهلي هيحصل على الدوري بعد ما وسع الفارق إلى 11نقطة مع نظيرة نادي الزمالك؟
الدوري لسه ف الملعب والزمالك هيرجع والمنافسه مش هتكون أهلي وزمالك بس الموسم ده.
*شايف أن الزمالك ممكن يرجع مع بداية الدور التاني بعد رحيل فيريرا؟
الزمالك عنده كل إمكانيات الرجوع وفريق محترم واسكواد كويس، بس رحيل فيريرا ف الوقت الحالي خطأ.
*رأيك في أداء كهربا بعد العودة وهل عودته ستؤثر بالإيجاب على الفريق؟
حقق المطلوب منه وعمل إضافة، مع الاستمرارية والتركيز داخل الملعب فقط.
*ماهو رأيك في صفقة انتقال لوكا مودريتيش إلى النصر السعودي؟
بعد انتقال رونالدو كله هيبقي عادي ولكن هتكون صفقة قوية وإضافة كبيرة للسعودية.
*هل ممكن ميسي يرجع لبرشلونة من تاني؟
مفيش حاجه بعيد وأنا أتمنى رجوع ميسي.
*رأيك في أداء محمد صلاح الفترة الأخيرة وهل رحيله عن ليفربول أصبح قريب من وجهة نظرك؟
هو حقق كل حاجه مع الليفر ممكن ياخد تجربة في مكان تاني وخصوصًا مع تراجع مستوى الفريق.
*ماهو النادي اللي تحب تشوف فيه محمد صلاح؟
فريق كبير مش حابب إنه ينزل بالمستوى ممكن برشلونه، باريس، ريال مدريد.
*في نهاية حوارنا تحب تقول ايه وماهي رسالتك للشباب؟
اللي بيفرق لعيب عن لعيب العقلية مش الموهبة لازم يعرفو دي وكل واحد بيكون عنده وعي ويكون محدد هدفه وطريق يمشي عليه لازم يكون في إنكار ذات كل متعمل بينك وبين نفسك أنا معملتش حاجه.
عن الكاتب
عن الكاتب
