ازاي نربي ولادنا في زمن الفتن؟ والله العظيم أنا حزينة كل الحزن لما أراه من جيل اليومين دول إلا من رحم ربي وعصم.
بقى مفيش حاجة عندهم اسمها تعليم.. العلم أصبح لا قيمة له في زماننا هذا.. مفيش حاجة عندهم اسمها صلاة، ولا قراءة قرآن، ولا أذكار، مع إن التليفون في إيديهم أربعة وعشرين ساعة، وتُعرض عليهم فديوهات قرآن وأذكار ومواعظ دينية.. وحتى في صيام رمضان تلاقي الولد بكل بجاحة فاطر وبيشرب سجاير وشاي أمام الصائمين كدة عادي مفيش كسوف ولا إحراج
(إذَا بُليِتُم فَاسْتَتِروا) أصبح جُل ما يهمهم ويستهويهم هو الأغانى الهابطة.. والتيك توك والشُهرة.. وإزاي يعمل فديوهات على التيك توك واليوتيوب ويكون مشهور ويحصل على أموال من خلاله، وإزاي يبقى تريند.. ده غير بقى الفُسح والخروج ولبس الملابس التي لا تليق بمسلم ومسلمة، ده غير الألفاظ الغريبة التي نسمعها وطريقة كلامهم زي كلمة ياسطا.. ويا زميل وحاجات كتير جدًا.. لغة غريبة علينا لا نعرفها.. وأيضًا الشتيمة والألفاظ البذيئة في الشوراع وبين الأصدقاء بعضهم البعض… وحاجات كتير جدًا بقت موجودة في حياتنا.. بقوا قليلي الأدب جدًا مفيش إحترام للآخرين.. ولا توقير للكبير.. ولا رحمة للصغير.. أنا عاوزة أعرف أنتوا مين..؟!!
لاء بجد انتوا حقيقي..؟
ولا الزمان ده بقى مش بتاعنا.. بالله عليكم استقيموا يرحمكم الله كفانا منكم، افتكروا أنكم مسلمين بلاش الشيطان يضحك عليكم أكتر من كدة (ولا تتبعوا خطوات الشيطان) راجعوا أنفسكم وتوبوا إلى الله، وعاوزة أقول لكل أب وأم قال المولى عز وجل (يَا أيُهَا الذِينَ آمَنوا قُوا أنفُسَكُم وأهلِيكُم نَارًا وَقُوُدُها النَاسُ والحِجَارة )
لازم تكونوا قدوة حسنة لأولادكم لأنهم بيتعلموا منكم ولأنكم محاسبون عليهم…اوعي تكوني مُلتزمة وبتُقيمي عباداتك ومُحتشمة وسايبة بنتك بتخرج متبرجة، ومش بتعلميها دينها وعقيدتها!! وأنت أيضًا أيها الأب، أين دورك في التربية؟!!
عاوزة أعرفك أن وجود حضرتك في البيت مش مجرد بنك بيمول البيت بالمصاريف!! أنت مُحاسب على أبنائك، وخلي بالك لإنك لو مربتش أولادك صح، فالعاقبة نار وقودها الناس والحجارة.. ربوا عيالكم صح، قال رسول الله صلى الله عليه وسلم ( كُلكم راع وكُلكم مسئول عن رعيتة) متفرحش إن ابنك بيعمل فديوهات على التيك توك ومشهور وبيأخد فلوس من الهيافة اللي بتشجعة عليها.. عندي سؤال لو سمحت هل ابنك هيبقى مشهور في السماء عند المولى عز وجل بالفديوهات دي اللي بتشجعة عليها؟؟!!
ربنا هيحاسبك على فكرة.. حاسب ابنك وعلمه وفهمه وعرفه إن الفديوهات دي حرام.. ومش بتفيد المسلمين بحاجة، وكلها في ميزان سيئاته.. والبنت اللي بتخرج بميكب كامل ونص شعرها خارج من الحجاب ولابسة ضيق وبنطلون مقطع، ومبين معالم جسمها، وأمها تبقى فرحانة بيها أوي، وتقول بنتي قمر ما شاء الله.. على فكرة أنتي هتتحاسبي أمام المولى عز وجل عشان سبتيها خرجت كدة..(كُلكم راع وكُلكم مسئول عن رعيته)
خلوا بالكم بالله عليكم احنا بقينا في خطر كبير.. طالع علينا أجيال مش عارفين دينهم ولا عقيدتهم صح…علموا ولادكم دينهم.. عرفوهم أخلاقنا الجميلة أخلاق المسلمين.. علموهم إن ربنا خلقنا في الدنيا دي عشان نعبده (وما خَلقتُ الجن والإنس إلا ليعبدون) يعني وظيفتهم الأساسية إنهم عباد لله جل وعلا
عرفوهم إن طلب العلم عبادة وإنه فريضة على كل مسلم ومسلمة.. حتى لو مش بيسمعوا كلامكم المهم تعملوا اللي عليكم وتبذلوا النصيحة… أوعوا تيأسوا من هداية أولادكم الرسول عليه أفضل الصلاة والسلام كان يدعوا الكفار للإيمان بالله ولم ييأس أبدًا وكان يحزن لموت الكافر إذا مات دون أن يدخل الإسلام.. فما بالك بابنك فلذة كبدك ثمرة عمرك هل تتركه للشيطان يأخذ بيده للنار؟؟!
أم أنك تساعده وتأخذ أنت بيد ابنك لطريق الله، لطريق الجنة
احنا بقينا غرباء في زماننا هذا..
احذروا الفتن بالله عليكم،
استقيموا يرحمنا ويرحمكم الله
تزينوا بالأخلاق..
اللهم اهدي أبناء وبنات المسلمين يارب العالمين.
عن الكاتب
موضوعات الكاتب
- مقالات2024.05.29هل حمدت ربك اليوم
- مقالات2024.05.16دعوة للحب
- خواطر2024.03.17أمنيتي
- مقالات2024.01.20طباع الشخصية النرجسية